Бүген: -- ------ 20-- --:--
О компании Настройки Телеканал "ТНВ-Татарстан" Телеканал "ТНВ-Планета" Видеоархив Реклама
Хәбәрләр тасмасы
05.10.2017

"Гаилә" мәчетендә авыру балаларга бушлай массаж ясыйлар

«Гаилә» мәчетендә балаларга бушлай массаж ясау буенча социаль проект эшли башлады. Аның кысаларында 30 бала тулы массаж курсын алып өлгерде. Проектның беренче этабы 15 октябрьдә төгәлләнәчәк, аңа кадәр тагын 30 бала массаж сеансларында катнашачак, дип хәбәр ителә Татарстан мөселманнары Диния нәзарәте сайтында.

Проектны «Гаилә» мәчете, Массажистларның милли ассоциациясе һәм Александр Панфиловның массаж мәктәбе тормышка ашыра. Бер ай дәвамында 500гә якын массаж сеансы ясалачак. Проектта күп балалы, аз керемле гаиләләрдә тәрбияләнүчеләр, медицина күрсәткечләре буенча массаж курсы алырга тиешле сабыйлар, инвалид балалар катнаша.

«Гаилә» мәчете имам-хатыйбы Рөстәм хәзрәт Хәйруллин проектның уникальлеге турында болай ди: «Массажга язылырга дип шалтыраткан кешеләрнең беренче соравы: „Бу чыннан да бушлаймы?“ Без бөтенләй ят кешеләргә ихластан ярдәм итүдән шулкадәр бизгәнбез икән. Александр Панфилов белән Марат Миндубаев безгә шушындый проектны бергә оештыру тәкъдиме белән мөрәҗәгать иткәч, ике дә уйламый ризалаштык. Церебраль паралич белән авыручы нарасыйлар, төрле җәрәхәтләрдән соң төзәлеп килүче сабыйлар килә. Өч-дүрт балалы гаиләләр бар. Аларга ярдәм итә алуыбызга бик сөенәбез һәм үз вакытларын, көчләрен жәлләмичә, шушы балаларга ярдәм итүче массаж осталарына зур рәхмәтебезне белдерәбез».

«Гаилә» мәчете, Массажистларның милли ассоциациясе һәм «Александр Панфиловның массаж мәктәбе» оештырган «Балалар өчен массаж» социаль проекты буенча ярдәм итәргә теләгән массажистлар шактый. Шунлыктан әлеге проектны кварталга бер тапкыр кабатлап торырга ниятлиләр. Теләге булган һәр әти-әни үзенең 10 яшькә кадәр балаларына бушлай тулы массаж курсы ясата алачак. Киләсе курска хәзердән үк язылып куярга мөмкин.

5 октябрьдә «Гаилә» мәчетендә шушы проектта катнашкан балалар өчен бәйрәм үткәреләчәк. Чарада теләгән һәр кеше катнаша ала. Проектны оештыручылар, массажистлар һәм балалар белән аралашу, аларның фикерен ишетү дә мөмкин булачак.

Өстәмә мәгълүмат өчен телефон номеры: 89274261422 (Илмир Хәбибуллин).

(Татар-информ)


www.tnv.ru - настройся на лучшее! Присоединяйтесь!