Музыкаль һәм әдәби тапшырулар баш редакциясе республика күләмендә зур уңышка иреште

Шушы көннәрдә «Яңа Гасыр» телеканалының музыкаль һәм әдәби тапшырулар баш редакциясе җитәкчесе Зөлфия Әсәдуллина Татарстанда милләтара һәм халыклар дуслыгы мөнәсәбәтләрен иң яхшы яктырткан проектлар буенча республикакүләм бәйгедә икенче урын яулады.

«Яңа Гасыр» телеканалы вәкиленең иҗади эше «Иң яхшы телетапшыру» номинациясендә уңышлы проектлар рәтеннән дип табылды. Бәйгегә Зөлфия Әсәдуллина «Каравай» программасы циклларын тәкъдим иткән. Циклга республикада яшәүче төрле милләт вәкилләренең фольклор бәйрәмнәре турында телеочерклар кертелгән. Мисал өчен, рус халык авыз иҗатының «Каравон» фестивале, Уяв чуваш халкы бәйрәме («Уяв длится месяц» телеочеркы) һәм мариларның Яңа ел бәйрәме («Шорык йол пайрем» телеочеркы) цикл эчендә урын алганнар.

Зөлфия Әсәдулина белән бергә җиңүне цикл өстендә эшләгән операторлар Данил Филатов, Дониер Кенджаев һәм Александр Грюнов та бәйрәм итәләр. Музыкаль һәм әдәби тапшырулар баш редакциясен зур җиңүе белән «Яңа Гасыр» телеканалы да тәбрик итә!