8 июльдә Казан телеманарасы якты төсләргә керәчәк

Казан телеманарасында 8 июльдә утлар бәйрәмчә кабыначак. Бу хакта Казан мэриясе матбугат хезмәте хәбәр итә.

Утлы тамаша 21:00 сәгатьтә башланып, 23:00 сәгатькә кадәр дәвам итәчәк. Манарада бәйрәм символы - ак ромашка сурәте пәйда булачак. Бу рәсем белән бергә котлаулар да барлыкка киләчәк.

Акция 8 июль - Гаилә, мәхәббәт һәм тугрылык көне уңаеннан үткәрелә.

Исегезгә төшерәбез, бәйрәм көненә Республикада бай мәдәни программа әзерләнә.

Автор: Ләйлә Шиһабетдинова

Фото: kzn.ru