Сөт һәм өмет. Ни өчен быел хуҗалыклар инвестиция программаларын кыскарта?

Быел сөтне сатып алу бәясе төшү сәбәпле, Татарстан җитештерүчеләре 6 миллиард 800 миллион сум акча югалткан. Алар товарны узган ел белән чагыштырганда 10 сумга кимрәк бәягә тапшырырга мәҗбүр.

Татарстан — сөтле төбәк. Терлекчелек белән шөгылләнүче купчелек хуҗалыклар өчен — ул керемнең төп чыганагы. Бездә ел саен аны җитештерү күләме арта. Әмма соңгы елларда тотрыклы торган хактан соң, бәянең шундый зур аерма белән кимүе — җитештерүчеләрне аптырашта калдыра һәм инвестиция программаларын яңадан карарга мәҗбүр итә. Үсеш булсын дип, җитештерү кләмен арттырабыз, әмма көтелгән файданы алып булмый диләр.