Беренче карлы төндә Казан урамнарыннан 340 тонна кар чыгарганнар

Узган төндә Казан урамнарыннан кар эретү пунктларына һәм вакытлыча җыю урыннарына 340 тонна кар чыгарганнар, дип хәбәр итә ТР башкаласы мэриясенең матбугат хезмәте.

Бүген Казанның кар белән тулган урамнарын чистартуга 327 берәмлек махсус техника һәм 471 эшче чыгачак дип көтелә. Төнлә Казан урамнарында 203 берәмлек махсус техника кардан чистарткан.

Юл эшчеләре боз барлыкка килмәсен өчен 516 тонна ком-тоз катнашмасы һәм 392 тонна реагент кулланганнар.

Казанда яшәүчеләрне кар яуган вакытта машина калдыруга җаваплы карарга чакыралар — юл буенда калдырылган машиналар төнлә техниканың сыйфатлы эшләвенә комачаулый.

Фото: TNV.RU