"Болгар радиосы"нда яңартылган студия ачылды

4 декабрьдә “Болгар радиосы” яңартылган студиясен ачты! Очрашуда "Яңа Гасыр" ТРК АҖ генераль директоры Әминев Илшат Юныс улы, "Болгар радиосы" башкарма директоры-баш мөхәррире Кәримов Илфар Илдус улы һәм радионың популяр алып баручылары катнашты.



Барлык мөмкинлекләрне дә күрсәтү өчен без студиядән “Болгар радиосы” Милли музыкаль премия лауреаты, Татарстан Республикасының халык артисты Вадим Захаров катнашында туры кушылу оештырдык. Вадим, тыңлаучыларның яратып өлгергән, шулай ук үзенең әле беркайда да башкарылмаган җырларын бүләк итте.

Бүгенге көннән “Болгар радиосы”н тыңлап кына түгел, ә bolgarradio.com сайты аша яхшы сыйфатта карап та булачак. Студиядә тулысынча техник база яңартылды, Full HD форматта төшерә торган сыйфатлы видеокамералар урнаштырылды. Хәзер “Болгар радиосы” сайты кунаклары “Сәхнәдәш”, “Иртәнге чәй”, “Хак дин” кебек популяр тапшыруларны “Видеотрансляция” бүлегендә туры эфир форматында карый алачак. Шулай ук ВК рәсми төркемендә дә.

Без “Болгар радиосы” студиясеннән алып барылган видеотрансляцияләр радио тыңлаучылары белән тагын да якынаерга һәм радиоконтент булдыру процессына чумарга мөмкинлек бирер дип ышанабыз.