Татарстанда 14 мартта +12 градуска кадәр җылытачак

Шимбә, 14 мартта, Татарстанда алмашынучан болытлы һава торышы көтелә, сизелерлек явым-төшем булмаячак. Төнлә һәм иртән кайбер урыннарда томан төшүе ихтимал.

Җил көньяк-көнбатыштан һәм көнбатыштан 5–10 м/с тизлектә исәчәк. Юлларда урыны белән көчле бозлавык саклана. Кайбер районнарда температура аермасы 22 градуска кадәр җитәргә мөмкин, дип хәбәр итә ТР Гидрометүзәге.

Төнлә республика буенча һава температурасы 0…-5 градус булачак, ә көнчыгыш һәм көньяк районнарда урыны белән -10 градуска кадәр суыта. Көндез исә һава +3…+8 градуска кадәр җылыначак, республиканың көнбатышында кайбер урыннарда +12 градуска кадәр күтәреләчәк.

Казанда төнлә 0…-2 градус, түбән урыннарда -5 градуска кадәр суыта. Көндез шәһәрдә һава температурасы +8…+10 градус булачак.

Фото: ИИ ярдәмендә ясалган / ТНВ