Иртәгә Татарстанда яшенле яңгырлар һәм боз явуы ихтимал

Пәнҗешәмбе, 18 июньдә, Татарстанда аязучан болытлы һава торышы фаразлана. Бу хакта ТР Гидрометеорология үзәге хәбәр итте.

Төнлә һәм иртән бераз һәм уртача яңгырлар явачак. Көндез дә явым-төшем сакланачак, аерым районнарда яшенле яңгыр көтелә, урыны белән боз явуы да мөмкин.

Җил көньяк-көнбатыштан секундына 5–10 метр тизлек белән исәчәк. Кайбер урыннарда аның тизлеге секундына 14 метрга кадәр, көндез аерым районнарда 15–20 метрга кадәр җитәргә мөмкин.

Төнлә һава температурасы +10…+15 градуска кадәр төшәчәк, көндез +21…+26 градуска кадәр җылыначак. Казанда төнлә +12…+14 градус, көндез +22…+24 градус көтелә.

Фото: сгенерировано ИИ / ТНВ