Биектау районында куркыныч янгында зыян күргән Хәкимуллиннар гаиләсенә ярдәм кирәк

Биектау районының Чыпчык авылында куркыныч янгында зыян күргән Хәкимуллиннар гаиләсенә ярдәм кирәк.

27 августта чыккан янгын Хәкимуллиннар гаиләсен йорт-җирсез калдырган. Кош-кортларны коткарырга һәм документларын гына алырга өлгергәннәр.

Пенсиядәге Эльмира ханым белән ире Фердинанд әфәнде улларында яшәп тора. Гаилә башлыгы — өченче группа инвалид. Бистә халкы аларга хәленнән килгәнчә матди ярдәм күрсәткән. Ләкин йортны торгызу өчен ул гына аз. Хәкимуллиннарга ярдәм итәргә теләүчеләр өчен реквизитларны киләсе сюжетта тәкъдим итәрбез.