Өлгереп булырмы? Татарстанның кайбер районнарында яңгыр сәбәпле урып-җыю эшләре алып барылмый

Бу атна буе да республикада яңгыр явачак. Тотрыксыз һава торышы циклон йогынтысы белән бәйле, ди синоптиклар. Явым-төшемнәр аеруча Татарстанның көнбатышында күп. Август башыннан Кайбыч районында 123 миллиметр яуган, бу  айлык нормадан ике ярым тапкырга артык. Яңгыр сәбәпле урып-җыю эшләре алып барылмый.

Бүгенгә Татарстанда 425 мең гектар мәйданда бөртеклеләр суктырылган. Бу барлык җирләрнең 32 проценты. Соңгы ике көндә 10 район игенчеләре кырларга бөтенләй чыга алмаган. Бу Әлки, Апас, Буа, Чүпрәле, Яшел Үзән районнары.