Бөгелмә мөхтәсибәте Халыкара өлкәннәр көне уңаеннан хәйрия ашы үткәргән

Кичә Халыкара өлкәннәр көнендә Бөгелмә шәһәренең Үзәк мәчетендә мөхтәсибәт тарафыннан тантаналы чара үткәрелә. Мәхәллә кешеләре, пенсионерлар, мохтаҗлар һәм аз керемлеләр өчен традицион бәйрәм мәҗлесендә Карабаш бистәсеннән тапшырылган яшелчәләр (гошер сәдакасы) таратылган. Бу хакта Татарстан мөселманнары Диния нәзарәте матбугат хезмәте хәбәр итә.

Бөгелмә шәһәренең Үзәк мәчетендә гошер сәдакасын җыю һәм тапшыру дәвам итә. Азык-төлек җыелмалары мохтаҗлар өчен хәйрия акциясенә, мәдрәсә шәкертләренә атап әзерләнә.

 Район мөхтәсибәте гошер сәдакасын җыю кампаниясендә актив катнашканы өчен Руслан Фәтхетдиновка, шулай ук бу изге эштә катнашучыларга рәхмәтен белдерә.

Фото: dumrt.ru