Фәнгә заманча караш: Әлмәттә Нефть югары мәктәбе

8 февральдә Россиядә Фән көне билгеләп үтеләчәк. Аның алдыннан төрле төбәкләрдә уку йортларының заманча кампуслары ачылды. Тантаналарда катнашучыларны видео элемтә аша ил Президенты Владимир Путин сәламләде.

Турыдан-туры элемтәгә Әлмәттән дә чыктылар. Биредә Фәнни-тикшеренү белем бирү үзәге - Нефть югары мәктәбе ачылды. Анда Татарстан Рәисе Рөстәм Миңнеханов катнаша. Монда ике укыту-лаборатория комплексы, 60 лаборатория, 72 аудитория урнашкан. Алар дөнья дәрәҗәсендәге иң заманча җайланмалар белән җиһазландырылган.