Ике ай эзләү фаҗига белән тәмамланды: Казанда Тамара Волкованың мәете табылган

Ике айга сузылган эзләүләр фаҗига белән тәмамлана: 9 февральдә югалган Тамара Волкованың мәете Казан— Яшел Үзән трассасында, «Әйшә» тукталыгы янында кар эчендә табылган. Бу хакта Kazanfirst Тикшерү комитетына сылтама белән яза.

Беренчел мәгълүматлар буенча, хатын-кыз өшүдән вафат булган. Мәеттә көч кулланып үтерү билгеләре табылмаган. Үлемнең төгәл сәбәбе кирәкле экспертизалардан соң ачыкланачак.

Искәртеп узыйк, Тамара Волкова 9 февральдә бер айлык кызын ире белән калдырып өйдән чыгып киткән. Соңгы тапкыр аны Ленинградская урамындагы даруханәдә һәм 104нче автобуста күргәннәр. Эзләү эшләре якынча ике ай дәвам иткән.