Россиядә машинадан чүп ташлаган өчен 200 мең сумга кадәр штраф яный

Хәзер Россиядә автомобильдән чүп ташлап калдырган кешеләргә автомобилен конфискацияләү мөмкинлеге белән 200 мең сумга кадәр штраф яный. Россия Федерациясе Президенты Владимир Путин шул турыдагы канун имзалады, дип яза "Татар-информ".

Документ нигезендә, автомобильдән яки мототранспорт чарасыннан ярамаган урында чүп ташлаган өчен штраф салына: гражданнарга – 10-15 мең сум, вазифаи затларга –  20-30 мең сум, юридик затларга – 30 меңнән 50 мең сумга кадәр.

Транспорт чарасын конфискацияләү дә каралган. Бу кагыйдәләрне кабат бозган кешеләргә яный.

Әгәр бу кагыйдә йөк автомобильләре, тракторлар яки тагылмалар ярдәмендә бозылса, штраф күләме арта: гади гражданнар өчен – 40 меңнән 50 мең сумга кадәр, вазифаи затлар өчен – 60 меңнән 80 мең сумга кадәр, юридик затлар өчен – 100 меңнән 120 мең сумга кадәр һәм шулай ук йөк машинасын конфискацияләргә дә мөмкиннәр.

Фото: ТНВ