Дамир Исхаков: "Татарларга камасутра кирәк"

"Йөрәктән йөрәккә" тапшыруының чираттагы кунагы Тарих фәннәре докторы Дамир Исхаков белән әңгәмә барышында татарларда бик үк кабул ителмәгән тема турында сөйләшеп алдык.

Луиза Закирова: "Каян килде ул идея? Тарихчы кешегә секс турында уйланулар килешәме?"

- Ул идеянең килеп чыгышы бик сәер булды. Төрек-татар лицейларын япкан вакытта, минем бер туган шалтыратты һәм Дамир абый сезгә югары оешмалардан игътибар итәләр диде. Мин шуны уйлап йөргәндә, миңа Хәкимов: "Ул бернәрсә белән дә шөгыльләнми, камасутра яза икән дип ишеттем", диде. Шул вакытта минем белән элемтәгә бер журналист чыкты. Мин шуның белән шөгыльләнәм дип уйлап чыгардым. Моннан соң шау-шу китте, интервьюлар ясый башладылар. Ул темага бик күп әдәбият җыйдым. Хатын "бу көфер почмагыңны кайчан бушатасың", дип әйтә башлады. Андый хезмәт кирәк, чөнки иң күп халыклар - кытайлылар һәм һиндларның хезмәтләре бик күп һәм бик сыйфатлы. Татарда, мөселман халыкларында мондый хезмәтләр юк, ә булырга тиеш. Халыклар исән булган вакытта ул өлкә турында да язарга кирәк.

Тарихчы сүзләренчә, башта ул аны "хайп" буларак башлаган, аннары, уйната торгач, мондый эшчәнлекнең татарга кирәк булуын аңлаган.