Кадрлар кытлыгы: ни өчен яшьләр искечә эшләргә теләми?

Хөкүмәт җитештерүне арттыруны таләп итә, ә предприятиеләр максатны үтәр өчен кадрлар таба алмый. 2023нче ел ахырына илдә 4 млн 800 мең белгечкә кытлык булган. Бер танышым әйтмешли, пенсия яшен күтәрмәгән булсалар, бәлки зур минуска китәр идек.

Бүген кадрлар базарын өйрәнүче белгечләр замана яшьләренең эштә үзен өлкән коллегалары кебек тотмавын анализлаган. Алар җитәкчене үз кубызына биетә. Офиста диван, бушлай чикләвек, каһвә булсын, җайлы график кирәк. Һәм бу шартларны булдырырга туры килә.