Татарстанда халыкка хәбәр итү системасын бүген тикшерәчәкләр

Татарстанда һәм Россиянең башка төбәкләрендә халыкка хәбәр итү системасын планлы тикшерү бүген, 9 октябрьдә узачак. Бу хакта Татарстан Гадәттән тыш хәлләр министрлыгының матбугат хезмәтендә хәбәр иттеләр.

Тикшерү вакыты үзгәрешсез калды. 10:40та сиреналар республика күләмендә, 10:44тә муниципаль дәрәҗәдә кабызылачак. Шулай ук 10:43тә телевидение һәм радиоканалларда тавышлы хәбәр яңгыратылачак. Халыктан тикшерүгә тыныч карауларын сорыйлар.

Әгәр билгеләнгән вакытта сирена яңгырамаса, бу хакта беркая да хәбәр итәргә кирәкми. Республикада халыкка хәбәр итү системасы 1980нче елларда барлыкка килгән, соңрак яңа торак микрорайоннары төзелгән. Белгечләр проблемалы урыннар турында хәбәрдар.

Фото: ТНВ