Татарстанда сайлауларга әзерлек башланды: өч көнлек тавыш бирү!

Россия Дәүләт Думасына депутатлар сайлауга ике айдан азрак вакыт калды. Илдә тавыш бирү өч көн барачак - шуңа сайлау алдыннан тынлык көне игълан ителми.

Бу хакта бүген Татарстанның үзәк сайлау комиссиясе рәисе Андрей Кондратьев сөйләде. Казанда "Точка выбора" мәгълүмат үзәгендә ул сайлауга әзерлек барышы белән таныштырды. Кунак булып Татарстан журналистлары берлеге рәисе, ТНВ генераль директоры Илшат Әминев чакырылган иде.

Сентябрьдә Дәүләт Думасына депутатлыкка кандидатлар өчен тавыш бирүдән тыш, Биектау бер мандатлы округы буенча Дәүләт Советына бер депутат сайлыйсы була. Моннан тыш, 40 муниципалитетта җирле үзидарә органнарына өстәмә сайлау үтәчәк.