Медицинаның авырткан урыннары!

2024нче елда Татарстан — медицина күрсәткечләренең күпчелеге буенча Россиядә алдынгы урыннарга чыга.

«Сәламәтлек саклау» илкүләм проектының үтәлеше 100%ка җиткерелгән. Бу, әлбәттә, табибларның һөнәри осталыгына бирелгән югары бәя. Шул ук вакытта, министрлыкның 22нче гыйнварда узган коллегия утырышында Республика Рәисе тармактагы җитди проблемаларга баш табиб һәм җитәкчеләрнең игътибарын җәлеп итте.

Беренчедән, белгечләргә языла алмау мәсьәләсе. Икенчедән, халыкның күрсәтелгән хезмәттән канәгать булмавы. Аларны хәл итмичә, тармактагы лидерлыкны саклап булыр микән?

Рәис сүзләреннән соң, безнең иҗат төркемнәр узган атнада шушы темаларны яктыртты һәм хаталар өстендә эшнең кайсы юнәлештә алып барылырга тиешлеген пациентларның үзләреннән сорады.