Рамил Шәрапов Яшел Үзән районында Сабан туенда кулын сындыра язган - видео

17 майда, юмор остасы, пародист Рамил Шәрапов Яшел Үзән районы Кече Шырдан Сабан туенда чыгыш ясаган. Бәйрәм аның өчен шактый авыр уза: артистның кулы сына язган. Сабан туеннан калган истәлекләрне Рамил социаль челтәрендә калдырган.

«Күңелсез хәл булды бит... Беренче уй: ничек Сабан туен алып барып бетерергә? Кул авырта, түзеп булмый, акырасы, елыйсы килә. Ә халык көтә бит! Тешне кысып мәйданга чыктым. Күл күтәрелми, әллә сынган, әллә вывих? Фельдшер килеп укол ясады»,- дип уртаклашкан артист.

Әмма Рамил Сабан туен ахырына кадәр алып барып бетерә: «Бәйрәм бик җылы узды. Хәзер хастаханәдә. Рентгенга керергә җыенам!», - дип, Рамил хәзерге хәленә ачыклык кертте.

Соңрак артист кулының сынмавын, ә бик каты имгәнүен әйтә. Кулы урыныннан чыкмаган микән дигән уе да бар.

Фото: "Туган авылым - Кече Шырдан" Вконтакте төркеменнән алынды

Автор: Ләйлә Шиһабетдинова