Винарис Илъегеткә Татарстанның атказанган артисты исеме бирелде

Бүген эстрада җырчысы Винарис Илъегет Татарстанның атказанган артисты исеменә лаек булды. Винарис шатлыклы яңалыгы белән үзенең телеграм каналында уртаклашты.

"Яраткан тамашачым, сезнең белән уртаклашасы килгән зур шатлыгым бар! Буген, 11 октябрь көнне, минем әниемнең туган көнендә, кечкенәдән җырга гашыйк булып, уен коралларын яратып, гаҗәеп шәһесләр ярдәме белән артист дәрәҗәсенә җитешкән Винарис Илъегет - Виталий Ефим улы Блехер мин. Бүген исә мәдәният министры һәм хөрмәтле Рәисебез Рөстәм Нургали улы Миңнеханов карары буенча, мина Атказанган артист исемен бирделәр! Минем өчен бу зур дәрәҗә.

Тормышны яратып, җырлап яшәргә өйрәткән әти-әниемә,бөек шәхесләребезгә, кадерле кешеләремә, тамашачыларыма, дусларыма, Лилиямә чиксез рәхмәтлемен!! Бу яхшы яңалык әниемнең туган көне җиткәндә булуы икеләтә бәхет!  Иҗатыма югары бәя бирүегезгә РәхмәтТатар халкым", - дип яза җырчы.