Ильмира Нәгыймова: 15 катта басып торасың һәм бер адым ясасам нәрсә булыр дип уйлыйсың

Эстраданың популяр җырчысы Ильмира Нәгыймова "30-40-50 ШОУ"да кунакта булды. Ул элекке ире җырчы Руслан Кираметдинов белән 10 ел гаиләне саклап калырга тырышуы һәм үз-үзенә кул салу дәрәҗәсенә җитүе турында сөйләде.

"Мин 10 ел гаиләне саклап калырга тырыштым һәм дөрес яшәмәгәнемне аңладым. Кеше нәрсә әйтер дип куркып, матурлыкны гына күрсәтеп яшәдем. Бәлки, беренче этапта ул дөрестер дә, чөнки син ул кешене сайлагансың, гаиләне саклап калырга тырышасың, әмма ераграк барган саен көчең аз, 15 катта басып торасың һәм бер адым ясасам нәрсә булыр икән дип уйлыйсың. Бу бит бетәчәк һәм рәхәт булачак. Шундый дәрәҗәгә җиткәч ахыры хәерле булмаска мөмкин икәнен аңлыйсың.  Җилкәңдә ике фәрештә кебек ике балаң утыра. Алар гына тотып кала. Үзегезне андый дәрәҗәгә җиткезмәгез. Кемнең ничек яшәгәнен беркем дә белми. Кешегә начар сүз язганчы да аның нәрсә үткәнен уйлагыз, сез бит ялтыравык кына күрергә мөмкинсез. Күңелегезгә гөнаһ алмагыз", - дип сөйләде җырчы әңгәмә барышында.

Әлеге подкастны "Болгар радиосы" киңлекләрендә дә тыңлый аласыз.