Эчке эшләр министрлыгы Гагарин Кубогы финалына әле гамәлдә булмаган уеннарга билет сату эшен тикшерә башлады

Казанда сайт аша Гагарин Кубогының өстәмә уеннарына билет сата башлаганнар. Эчке эшләр министрлыгында
моның мошенниклар эше булуын тикшерәләр. Бу хакта "Татар-информ" хәбәрчесенә мәгълүм булган.

Әлеге сайтта 25 апрельдә булачак уенга билетлар сата башлаганнар. Кайберләренең бәясе 20 мең сумга җиткән. Әмма 25 апрельгә куелган матчның узу-узмавы әлегә төгәл билгеле түгел.

Финал уеннары 17 һәм 19 апрельдә Казанда, ә калган икесе Мәскәүдә узачак. Кубокны баш өстендә күтәрү өчен командаларга 4әр җиңү кирәк. Кирәк булган очракта командалар 25 һәм 29 апрель көннәрендә дә Казанда уйнаячаклар.