Татар егетләре СВОда ил күген дроннардан ничек саклый?

Оборона министрлыгы хәбәрләрендә, Россиягә 500гә кадәр БПЛА җибәрелгән көннәр бар. Алар - СВО зонасын узып, монда үтеп керә алганнары гына. Ә күпмесе чиктә юк ителә.

Узган атна ахырында ТНВның хәрби хәбәрчеләре - “7 дней” тапшыруы журналистлары, Махсус хәрби операция зонасыннан чираттагы командировкадан кайтты. Алар бу юлы төшергән бригадада Татарстаннан 300ләп ир-егет хезмәт итә. Күпчелеге - Украина ягыннан очып килгән дроннарга каршы тора. Мондый бригадалар булмаса, Россия төбәкләренә йөзләгән түгел, меңләгән дрон килеп җитәр иде, ди хәрбиләр.

Һәр егетнең үз язмышы, СВОга килү тарихы. Ә аларны берләштергәне - БПЛАны анда күреп алып, юк итеп, мондагы тынычлыкны саклау. Һәм алар бу бурычны милли рух һәм туган җирен ярату хисе белән үти.