Татарстан кырларында урып-җыю эше бара

Татарстан игенчеләре уракка төште. Хәзерге вакытта 8 районның кырларында эш бара.

Беренчеләрдән булып басуга Актаныш, Апас, Буа һәм Нурлат комбайнерлары чыкты. Аларның урып-җыюга болай иртә керешкәне юк иде әле. Язның иртә килүе һәм яңгырлар яумау — эш тәртибен үзгәрткән.

Авыл хуҗалыгы министрлыгында әйтүләренчә, бу әле уңышны җыеп карау гына — бөртекнең составын һәм гектарыннан күпме чыгуын белү өчен. Корылык салган зыянны киметү өчен игенчеләр министрлык тарафыннан булдырылган план буенча эшли.