Түбән Камада торак йортта газ шартлаганнан соң җинаять эше кузгатылды

Түбән Кама шәһәрендә көнкүреш газы шартлау факты буенча җинаять эше кузгатылган. Бу хакта Россия Тикшерү комитетының Татарстан буенча тикшерү идарәсе җитәкчесенең өлкән ярдәмчесе Андрей Шептицкий хәбәр итте, дип яза "Татар-информ" мәгълүмат агентлыгы.

Исегезгә төшерәбез, бүген иртән Түбән Камада күпкатлы торак йортта газ шартлаган иде.

Тикшерү мәгълүматлары буенча, шартлау булганчы 26 яшьлек ир-ат балконга тәмәке тартырга чыккан, аны шартлау дулкыны урамга чыгарып аткан.

Тикшерүчеләр «иминлек таләпләренә җавап бирми торган хезмәт күрсәтү» маддәсе буенча җинаять эше кузгаткан. Хәзер газ чыгу чыганагы ачыклана.

Фото: МЧС РТ