Казанда мошенниклар 87 яшьлек пенсионерны 200 меңгә алдаган

Казанда яшәүче 87 яшьлек пенсионер 200 мең сум акчасын мошенникларга биргән. Бу хакта шәһәр мэриясе матбугат хезмәте хәбәр итә.

Җинаятьчеләр хатын-кызга өй телефонына шалтыратып, аның туганы юл-транспорт һәлакәтенә эләккәнен хәбәр иткән. Мәсьәләне хәл итү өчен алар пенсионерны 200 мең сум акча бирергә күндерәләр. Акчаларны курьер алып киткән.

Соңрак зыян күрүче туганы белән элемтәгә керә һәм аның белән барысы да яхшы икәнен аңлый. Шуннан соң хатын-кыз полиция хезмәткәрләренә ярдәм сорап мөрәҗәгать итә. Әлеге хәл буенча җинаять эше кузгатылган.

Фото: pixabay