Казанда 17 яшьлек үсмер җәяүлеләр юлында барган хатын-кызны бәрдереп үтергән

Кичә Казанда машина йөртү таныклыгы булмаган 17 яшьлек егет хатын-кызны бәрдергән, дип хәбәр иттеләр Татарстан буенча Эчке эшләр министрлыгы матбугат хезмәтендә. Алынган җәрәхәтләрдән хатын-кыз шунда ук үлгән.

Фаҗига Казанның Борисоглебское бистәсендә була. Беренчел мәгълүматлар буенча, башта машина йөртүче тротуарга килеп керә, анда хатын-кызны бәрдерә, ә аннары автомобильләр тукталган урынга килеп керә. Интернет челтәрендә вакыйга урыныннан видео пәйда булды.