Татарстанда быел беренче тапкыр өч игезәк туган

Гаилә елының Татарстан өчен иң күркәм вакыйгасы! Казанда - Марат Садыйков исемендәге 7нче шәһәр хастаханәсенең Перинаталь үзәгендә беренче тапкыр өч игезәк туган. Алар - Республика буенча да 2024нче елның беренче өчле игезәге.

Перинаталь үзәкне быелның февралендә Россия Президенты Владимир Путин катнашында ачканнар иде. Бүген өчләтә бәхет елмайган әнине һәм бәбиләрне өйләренә чыгардылар. Хәзер Максимовлар гаиләсендә 5 бала тәрбияләнәчәк. Аларны котларга дип туганнары җыелды. Зур гаиләнең шатлыгын хәбәрчебез Люция Нотфуллина да уртаклашты.