Өстән очып килсә, аска качасы. Дроннардан яшеренү урыннары халыкны кабул итәргә әзерме?

Татарстан өчен ел тынычсыз башланды. Берничә тапкыр пилотсыз очкычлар һөҗүме ихтималы барлыгы игълан ителде, зыян да салдылар. Казанның Мәскәү районындагы сәнәгат зонасында газ цистернасына эләктеләр, Әлмәттә максатка ирешә алмадылар - 2 дрон бәреп төшерелә.

21нче гасыр коралы - дроннан сакланыр өчен, ике дивар кагыйдәсен истә тотарга кирәк, ди белгечләр. Ягъни 2 кат стена артына яшеренәсе. Берсе дрон бәрелеп җимерелсә, икенчесе - аның калдыкларыннан саклый. Тагын да ышанычлысы - җир астында урнашкан яшеренү пунктлары. Татарстанда алар 1 мең, Казанда 300дән артык. Узган ел җирле хакимият аларның әзерлеге мәсәләсен күтәрде. Бу атнада Рүзәл Шәрипов Казанның яшеренү урыннарының нинди хәлдә булуын ачыклады.