Кабан күле буендагы агач кисүләр Казанда бәхәс кузгатты

Бу көннәрдә Казан халкын борчуга салган хәлдән башлыйк. Кабан күленең - Мәрҗани урамы ягындагы ярын тәртипкә китерә башладылар һәм аның буенда үскән агачларны кискәннәр.

Шәһәр хакимияте моны - кеше иминлеген саклау максатыннан эшләнде дисә, биредә яшәүчеләр - башкаланың тарихи үзәгендә кабатланмас мохит югалды, дип чаң суга. Эшнең технологиясе дә ризасызлык китереп чыгарган. Күл буена салынган ком - сулыкны пычрата, диләр. Җәмәгатьчелектә мондый шау-шу Урицкий паркын төзекләндергәндә бер купкан иде инде. Ул чакта 100 еллык талны аудардылар. Ул хәлдән сабак алынмаганмы? Әллә сәбәп башкадамы? Фикерләрне Рүзәл Шәрипов тыңлады.