Лениногорскида яшәүче 36 яшьлек хатын-кыз мошенникларга 1,3 миллион сумга якын акча күчергән

Лениногорскида яшәүче 36 яшьлек хатын-кыз мошенникларга 1,3 миллион сумга якын акча күчергән. Бу хакта Татарстан буенча Эчке эшләр министрлыгының матбугат хезмәте хәбәр итә.

Мошенниклар киң таралган схема буенча эш иткән. Башта билгесез кеше хатын-кызны ачык чатта SMS-хәбәрдәге кодны әйтергә күндергән. Аннары үзен Росфинмониторинг хезмәткәре дип таныштырган кеше аның исеменә кредит рәсмиләштерелүе турында хәбәр иткән.

Соңрак үзен ФСБ хезмәткәре дип таныштырган мошенник хатын-кызны террорчылыкка ярдәм итүдә гаепләп, җинаять җаваплылыгы белән куркыткан.

Курыккан хатын-кыз кредитлар рәсмиләштергән һәм акчаны җинаятьчеләрнең счетларына күчергән. Алданганын аңлагач, ул полициягә мөрәҗәгать иткән. Җинаять эше кузгатылган.

Фото: ТНВ