Артур Кортес ТНВ эфиры барышында смартфон һәм машина уйнатуда катнашу шартларын аңлатты

ТНВ каналындагы «Гаилә белән сайлыйбыз!» фотоконкурсының алып баручысы Артур Кортес iPhone 17 һәм Sollers ST8 уйнатуда катнашу шартлары турында сөйләде. Аның сүзләренчә, конкурска инде 90 меңгә якын кеше кушылган.

«Смартфон һәм автомобиль оту өчен тавыш бирергә һәм тавыш бирүдә катнашучының беләзеген алырга кирәк. Аннан соң сайлау участогыннан чыгып, аның тышкы өлешендә, сайлау участогы фонында фотога төшәргә кирәк», — дип аңлатты ул.

Фотода сайлау участогына керү өлешенең танырлык элементлары — язулар, плакатлар яки баннерлар булырга тиеш. Шулай ук рәсемдә ким дигәндә бер балигъ булган кеше булуы шарт, ә катнашучыларның берсенең беләзеге күренергә тиеш.

Фотосурәтне «ВКонтакте» социаль челтәрендә #ВсейСемьейНаВыборы һәм #ТатарстанАлга хештеглары белән урнаштырырга кирәк. Шуннан соң язма конкурс базасына эләгә, анда җиңүчене очраклы саннар генераторы сайлый.

Кортес техник төркемнең шартлар үтәлешен игътибар белән күзәтүен билгеләп үтте. Кичә икенче автомобиль уйнату нәтиҗәләре гамәлдән чыгарылган иде.

"ВКонтактедагы бит паспортка бәйләнмәгән. Кулланучының уйлап чыгарылган туган көне булган. Ул кешегә 15 яшь иде, һәм техник регламент нигезендә без аны конкурста катнаштыра алмадык», — дип ассызыклады ул.

Кабат уйнату бүген кич узачак. «Казан» гаилә үзәге янында Салават Фәтхетдинов чыгышыннан соң, 21:00 сәгатьтә берьюлы ике автомобиль хуҗасының исемнәре игълан ителәчәк. Конкурс өчен язмалар 20:00 сәгатькә кадәр кабул ителә.