“Ров”: ТНВ Казан каймасына багышланган документаль фильм тәкъдим итте

Бөек Ватан сугышы вакытында казылган - Казан каймасына багышланган документаль фильм дөнья күрде. ТНВ каналы төшергән “Ров” картинасын Казанның "Мир" кинотетрында тәкъдим иттеләр.

Аның режиссеры безнең хезмәттәшебез - Ринат Юзаев. Тарихка кереп калган, 331 чакрымга сузылган окопны, нигездә, 14-15 яшьлек кызлар һәм хатыннар казый. Аларга 40 градуслы салкыннарда эшләргә туры килә. Күбесе шунда сәламәтлеген югалта.

Казан каймасында хезмәт куйган кешеләрнең исән калганнары хәзер инде 100 яшькә җитеп килә. Фильм безнең каналда 9нчы май көнне кичке 6да күрсәтеләчәк.