Кичә Казанда 103 ел элек куелган температура рекорды яңартылды

Казанда 18 май өчен температура рекорды яңартылды. Бу хакта Татарстан Гидрометеорология үзәге белгечләре хәбәр итте.

«Казан» метеостанциясе мәгълүматлары буенча, кичә һаваның максималь температурасы +30,0 градус тәшкил иткән. «Казан-Аэропорт» АМСГда +30,1 градус, ә «Казан-Сокол» станциясендә +30,3 градус теркәлгән.

Элегрәк бу көн өчен абсолют максимум 1923 елдан бирле сакланган — «Казан-Университет» станциясендә +29,8 градус. Шулай итеп, 103 ел дәвам иткән рекорд яңартылды.

Фото: TNV.RU