Татарстанда 26 июньгә һава торышының начараюы турында кисәттеләр

Татарстан Гидрометүзәге белгечләре республикада якындагы җомгада көтелгән начар һава торышы турында кисәтте.

Аерым алганда, 26 июньдә республикада урыны белән көчле яңгырлар явачак, алар яшен белән үрелеп барачак.

Моннан тыш, көньяк-көнбатыш һәм төньяк-көнчыгыш җилнең көчәюе көтелә. Кайбер урыннарда җил тизлеге секундына 15–17 метрга кадәр җитәчәк.

Татарстан Гадәттән тыш хәлләр министрлыгы иминлек чараларын үтәргә киңәш итә.

Фото: ТНВ