Татарстанда төнге салкыннан соң һава +12 градуска кадәр җылыначак

Бүген Татарстанда төнге салкыннан соң һава +7…+12 градуска кадәр җылыначак. Казанда термометрлар +8…+10 градус күрсәтәчәк.

Татарстан Гидрометеорология үзәге фаразы буенча, бүген республикада болытлы һава торышы көтелә, әмма зур явым-төшемнәр булмаячак. Җилнең тизлеге секундына 5–10 метрга җитәчәк.

Моңа кадәр синоптиклар атнага һава торышы фаразын тәкъдим иткән иде. Алар аңлатуынча, хәзер һава торышы Арктикадан килгән антициклон йогынтысында формалаша, шуның аркасында салкынайды. Әмма һава әкренләп үзгәреп, җылыначак.

Фото: TNV.RU