Апас районында яшәүчеләр ТР Рәисе сайлауларында Миңнехановны тәкъдим итүне сорадылар

Кичә Татарстан Апас районы Советының дүртенче чакырылыш 72 нче сессиясендә Урта Балтай авылыннан хезмәт ветераны Мөнирә Гыйззәтуллина ТР Дәүләт Советы Рәисе урынбасары Марат Әхмәтовка Рөстәм Миңнехановка быел көздә узачак ТР Рәисе сайлауларында үз кандидатурасын тәкъдим итүен сорап мөрәҗәгать итте.

"Быел Татарстан Республикасы рәисен сайлаулар узачак. Шуңа бәйле рәвештә, район халкы исеменнән Сезгә зур үтенеч белән мөрәҗәгать итәм. Татарстан Республикасы Рәисе Рөстәм Нургали улы Миңнеханов киләсе сайлауларда да үз кандидатурасын куйсын иде. Безнең үтенечебезне аңа җиткерсәгезче!", - диде хезмәт ветераны.

Фото: apastovo.ru