Халык санын алуга артистлар, җәмәгать эшлеклеләре, сәнгать әһелләре кушылды

Бу атнада халык санын алуга артистлар, җәмәгать эшлеклеләре, сәнгать әһелләре кушылды. Араларында катнаш гаиләдә үскән шәхесләр дә, Татарстаннан читтә туучылар, төрле диалектларда аралашучылар да бар. Алар татар телен ничек өйрәнгән? Ни өчен туган телдә 3 сүз белү - ул әле син татар түгел дию белән бер түгел? Милли үзаң алар өчен нәрсә ул? Без бу атнада халык санын алуда катнашкан милләттәшләребез белән аралаштык һәм бабаларыбыз амәнәтенә алар керткән өлешне күрдек.

Бу атнадагы беренче сәяхәтебез Россия һәм Татарстанның атказанган сәнгать эшлеклесе, композитор Резеда Әхияровага. Халык санын алучы белән өенә килдек. 33 сорауга җавапны 10 минут эчендә язып алалар.

Ул Башкортстанда туып-үсә. Иҗат юлы татар мәдәнияте белән бәйле. Аның музыкаль әсәрләре алтын фондка кереп, Республикабызда гына түгел, чит илләрдә дә яңгырый.

Резеда ӘХИЯРОВА, Россия һәм Татарстанның атказанган сәнгать эшлеклесе, композитор
- Мин үземне татар дип хис итәм, чөнки. гаиләдә татарча сөйләшә идек.

Винарис ИЛЬЕГЕТ, җырчы:
- Мин катнаштым, үземне анда татар дип ихлас иттем, яздым, чын күңелдән, чөнки мин татар дип үземне хис итәм, һәм шулай яшим дә.

Күз алдына китерүе дә кыен, әмма 16 яшькә кадәр җырчы Винарис Ильегет татарча сөйләшмәгән. Рус мәктәбендә укыган.

Катнаш гаиләдә үссәм дә, татарлык — минем иҗатымда, яшәү рәвешендә, ди артист.

Винарис ИЛЬЕГЕТ, җырчы:
- Әтием еврей, әни татар. Әти гел әйтә иде, мин 54 ел буе иң чибәр кыз татар кызы белән яшәдем, 54 ел мин татарлар белән аралаштым. Мин чын татар, син дә минем улым татар дия иде.

Татарстанның атказанган артисты Алинә Шәрипҗанова да катнаш гаиләдә туып үскән. Әмма кечкенәдән татар мәдәниятенә гашыйк кыз үзен чын татар дип хис итә. Балаларында да татар кешесенә хас сыйфатлар тәрбияләргә тырыша.

Алинә ШӘРИПҖАНОВА, Татарстанның атказанган артисты
- Без ничек балаларны тәрбиялибез, өлкән кешеләргә хөрмәт, чисталык, милли ризыклар, җырлар татар телендә, көйләр, ул монда — йөрәктә.

Татарстанның халык артисты Резеда Төхвәтуллина Әлки районында туып үскән, кечкенәдән мишәрчә сөйләшә. Сәхнәгә чыгуга ул әдәби татар теленә күчә.

Резеда ТӨХВӘТУЛЛИНАТатарстанның халык артисты, Кәрим Тинчурин исемендәге татар дәүләт драма һәм комедия театры артисты
- Һәрбер акыллы кеше нинди милләттән туа, шулай дип язарга тиеш. Нинди телдә сөйләшсәм дә, нинди ата-анадан туа, шул милләттән дип язылырга тиеш.

Шул ук 33 сорау. Берьюлы ике кешедән халык санын алу мөмкинлеге. Татарстанның халык шагыйре Ренат Харис та, хатыны белән халык санын алучыны бу атнада өйдә кабул иттеләр. Милләт һәм тел турындагы сорауларга җавап табигый.

Фәнни һәм публицистик, әдәби тәнкыйть мәкаләләрен рус телендә, шигырь, поэмаларны татар телендә яза ул. Кеше берничә телне камил белергә мөмкин, әмма аны башка милләт кешесе итми, ди.

Җанисәпнең беренче ункөнлеге нәтиҗәсе буенча Татарстанда миллионнан артык кеше исәпкә алынган.