Өч сеңлесен янгыннан коткарган Кукмара укучысын батырлыгы өчен бүләкләргә җыеналар

Кукмара районының Кенәбаш авылында 9 июль көнне янгын чыгып, дүрт балалы Хәлимовлар гаиләсе йорт-җирсез кала. Гаиләдә иң олы бала — 12 яшьлек Ринат Хәлимов өч сеңлесен янгыннан коткарган. Батыр үсмерне бүләкләү дә көтелә икән.

Бу хакта «Татар-информ» хәбәрчесенә Починок-Кучук авыл җирлеге башлыгы Риналь Гыйниятов сөйләгән. «Ринатны батырлыгы өчен бүләкләү дә каралган, МЧС тарафыннан да, район тарафыннан да булырга тиеш», — дигән авыл җирлеге башлыгы.

Ринат укый торган мәктәптә дә аның гамәлен каһарманлык итеп күрсәтәчәкләр.

Фото: Әлфия Хәлимованың шәхси архивы