Татарстанда тагын бер балыкчы батып үлгән

Кичә кич белән Югары Ослан районының Яр буе Морквашы авылында яшәүчеләр балыкчы гәүдәсенә тап булалар. Татарстанның Гадәттән тыш хәлләр министрлыгының матбугат хезмәтендә хәбәр итүләренчә, 1955 елгы ир-ат көймәсеннән суга егылып төшеп, батып үлгән.

Балыкчының югалуы хакында шул ук көнне билгеле була. Ир-ат иртән көймәсендә балык тотарга дип чыгып китә. Шалтыратуларга җавап бирмәгәч, аны эзли башлыйлар.

Гәүдәгә ярдан 1 метр ераклыкта тап булалар. Шаһитләр балыкчыны судан чыгарганнар. Беренчел фаразлар буенча, ул көймәсеннән суга егылып төшкән. Балыкчы үзе белән коткару жилетын алмаган була.

Фото: t.me/mchstatarstan