Татарстанда бер көнне ике хоккейчы үлгән

Татарстанда 1 көнне 2 хоккейчы үлгән. Кичә Азнакайда 11 яшьлек малайның һәм Казанда 53 яшьлек ирнең гомере өзелә. 

Малай күнекмәләрдән кайткан була. Аның берничә ел хоккей белән шөгыльләнүе билгеле. Кинәт хәле начарлана, ашыгыч ярдәм гомерен коткарып кала аламаган.

Казанның Яңа Савин районында урнашкан "Триумф" боз сараендагы хоккей ярышлары вакытында бер уенчының йөрәге туктый. Монда башкаланың "Рәхәт" хоккей лигасы командалары матчы уза, анда һәвәскәр спортчылар көч сынаша. Уенның 3 нче периоды барышында запаста утыручылар эскәмиясендәге ир-ат спортчының кинәт хәле начарая. Табиблар аңа шундук ярдәм итә башлый, 40 минут дәвамында аның тормышы өчен көрәшә. Әмма ул вафат була. Рәсми булмаган чыганаклар белдерүенчә, спортчыга 53 яшь һәм ул очучы-сынаучы булып эшли. Сәламәтлегенә зарланмый, әлеге спорт төре белән озак еллар буе шөгыльләнә. Һәрдаим медицина тикшеренүләре уза. Үлеменең сәбәбе - йөрәгенең тибүдән туктавы дип фаразлана.

 Бүген "Татарстан хәбәрләре"ндә укыгыз.

Фото: freepik.com