Казан дары заводында җимерекләр астыннан коткаручылар һәлак булган ир-атның гәүдәсен чыгарды

Казан дары заводында җимерекләр астыннан коткаручылар һәлак булган ир-атның гәүдәсен чыгарды. Бу хакта Татарстан Сәламәтлек саклау министрлыгында хәбәр иттеләр.

Хәзерге вакытта тагын ике зыян күрүче хастаханәдә кала. Авыр җәрәхәтләр алган хатын-кызның хәле тотрыклы. Шәһәрнең 7нче хастаханәсенә китерелгән ир-ат уртача авырлыктагы хәлдә.

Искәртеп узыйк: кичә заводта янгын чыгып, корылманың өлешчә җимерелүе теркәлгән иде. Сәбәп — техноген характерда. Татарстан буенча Тикшерү комитеты «Куркыныч җитештерү объектларында сәнәгать иминлеге таләпләрен бозу» маддәсе буенча җинаять эше кузгатты.