24 апрельдә Татарстанда яңгыр һәм көчле җил көтелә

Җомга, 24 апрельдә, Татарстанда көндез бераз яңгыр явачак. Урыны белән көньяк җиленең тизлеге секундына 15–20 метрга кадәр көчәергә мөмкин, дип кисәттеләр Татарстан Гидрометеорология үзәгендә.

Төнлә республика буенча һава температурасы -1…+4 градуска кадәр төшәчәк, Казанда +2…+4 градус булачак. Көндез Татарстанда һава +9…+14 градуска кадәр җылыначак, ә башкалада +10…+12 градус көтелә.

Синоптиклар мәгълүматына караганда, яллар башында ук көчле җил һәм яңгырга җепшек кар да кушылачак. Көндез һава температурасы +3…+8 градустан югары күтәрелмәячәк. Якшәмбе көнне дә начар һава торышы сакланачак, төнлә температура -3 градуска кадәр төшәчәк.

Фото: ЯИ ярдәмендә ясалган / ТНВ